約見管業處 (1) 跟進情況
- 陽光天盛
- 2021年6月25日
- 讀畢需時 3 分鐘
大家仲記得我地係本月初曾經聯同區議員和多名街坊，一齊約見富城管業處，就一些屋苑管理事務進行過溝通交流。
事隔半月，管理公司對我地所反映嘅問題，採取咗啲乜嘢措施呢？雖然大家應該都唔會滿意富城嘅跟進工作，不過我地都係在此將富城嘅跟進情況向大家介簡單講一下吧。大家有乜嘢意見補充，或者有乜嘢新問題需要管理公司處理的，可以留言俾我地，又可以參加我地同富城下次嘅見面會。會面日期時間待定，按照雙方上次約定係每月會面，而下次會面應該係7月第二週，我地正係約緊富城管業處，會盡快通告。
以下係當天討論的一些要點，同埋富城嘅跟進工作：
1. 冷氣滴水問題
冷氣機位滴水問題非常普遍，居民要求管業處積極跟進，另外有反映廚房窗外渠位也存在滴水問題。管業處回應只要收到投訴，都一定會跟進，不過有時候可能會遇到一啲困難，如投訴人/被投訴人唔俾入屋檢查。
跟進工作 - 富城後來出嘅呢張通告，貼示大堂告示板。
2. 環境衛生問題
有居民反映垃圾房臭氣熏天，可能長期都無清洗，要求管業處要認真加強清洗、消毒。另外，樓層走廊有時候地面有垃圾，好多日都無清理，也需要重視。管業處答應會同清潔公司跟進，會回覆跟進情況。
跟進工作 - 不見富城有具體工作通告。
3. 燃燒香燭冥鏹問題
有居民反映有人係樓宇走廊內燃燒香燭冥鏹，認為應該要禁止。管業處回覆自從室外燃燒香燭冥鏹地點搬咗之後，已經比較少收到投訴，至於走廊內燃燒香燭冥鏹，需要瞭解多啲具體個案再討論，希望居民有遇到這類問題，盡量向管業處反映。
跟進工作 - 不見富城有具體工作通告。
4. 屋苑內踩單車問題
根據反映主要有3類人習慣係屋苑內踩單車 (1) 送外賣 (2) 屋苑工人 (3) 居民。管業處同意，如果係屋苑工人，係完全可以控制得到，管業處應該要馬上處理。另外對於外賣單車，管業處會致函相關外賣平臺，要求佢地指示外賣員遵守屋苑管理要求。
跟進工作 - 不見富城有具體工作通告。
5. 噪音問題
主要有兩類投訴 (1)裝修噪音 (2) 鄰居噪音。管業處反映裝修噪音相對比較容易追蹤及處理，一般裝修工人大致都遵守噪音工作時限，不過居民自己動手做一啲好似鑽牆嘅噪音，就比較難追尋和處理，有時候需要入屋檢查也未必得到住戶配合。
跟進工作 - 富城後來印制呢張通告，放入住戶信箱。
6. 夜間投訴
關於噪音問題，大多數發生在夜間，但係收到好多居民投訴管業處夜間當值人員處理各樣投訴都不積極，有時候熱線無人接聽，或者接聽者對居民態度非常之怠慢。管業處同意會內部跟進，對員工加強培訓，任何時候都應該要積極處理客戶意見。
跟進工作 - 不見富城有具體工作通告。
7. 吸煙問題
我地反映屋苑公眾地方普遍存在吸煙、扔煙頭問題，既影響環境衛生，亦影響他人健康。管業處回應屋苑公眾地方，現時有口罩令(吸煙不受轄免)還算可以規管、勸喻，如果回復係正常時期，係無現行法例唔俾係屋苑公眾地方吸煙或指定吸煙區，到時候其實係束手無策嘅，呢個係比較令我地失望，相信日後需要再研究有無對策。
跟進工作 - 不見富城有具體工作通告。
8. 養狗問題
居民反映有住戶養狗，一般無影響其他住戶的話，都可以容忍看待，但係有住戶係屋苑範圍入面放狗，甚至於任由狗隻便溺又唔處理，對於呢啲個案，要求管業處一定要嚴肅處理。
跟進工作 - 不見富城有具體工作通告。
~完~
留言