約見管業處 (1)

推動社區建設，關鍵在於公共參與和對話！我地多謝區議員和多名街坊支持，今日同我們一齊約見富城管業處，就一些屋苑管理事務進行溝通交流。

大家都明白良好的物業管理，對屋苑十分重要，透過管理維修，不但令屋苑時刻保持良好狀態，更不斷改善和提升屋苑設施，改善居民的生活質素，提升物業價值。今日嘅見面交流係一個好開始，相信可以促進居民與管理公司之間溝通和互信，就屋苑事務，保持雙方友好有效溝通，發揚互助的鄰裡精神，令社區更和諧。

照片經過當事人同意刊登，如有異議，請通知admin刪改。

以下是今天所討論的一些要點：

1. 滴水問題

冷氣機位滴水問題非常普遍，居民要求管業處積極跟進，另外有反映廚房窗外渠位也存在滴水問題。管業處回應只要收到投訴，都一定會跟進，不過有時候可能會遇到一啲困難，如投訴人/被投訴人唔俾入屋檢查。

如果係樓面滲水問題，管業處係有儀器可以檢測，查找源頭然後要求責任方處理的，對於不配合處理漏水問題嘅住戶，管業處會報食環處等相關部門依法跟進。

無論係邊一類投訴，如果有影相或拍片，係有助於查找問題根源的。

2. 環境衛生問題

有居民反映垃圾房臭氣熏天，可能長期都無清洗，要求管業處要認真加強清洗、消毒。另外，樓層走廊有時候地面有垃圾，好多日都無清理，也需要重視。管業處答應會同清潔公司跟進，會回覆跟進情況。

對於大件裝修垃圾及棄置傢俬問題，我地認為座頭保安一般都能夠掌握情況，知道係邊一戶做裝修、換傢俬、換電器…，座頭保安可以主動啲提請相關住戶自行將大件垃圾送到垃圾站處理。

3. 燃燒香燭冥鏹問題

有居民反映有人係樓宇走廊內燃燒香燭冥鏹，認為應該要禁止。管業處回覆自從室外燃燒香燭冥鏹地點搬咗之後，已經比較少收到投訴，至於走廊內燃燒香燭冥鏹，需要瞭解多啲具體個案再討論，希望居民有遇到這類問題，盡量向管業處反映。

4. 屋苑內踩單車問題

根據反映主要有3類人習慣係屋苑內踩單車 (1) 送外賣 (2) 屋苑工人 (3) 居民。管業處同意，如果係屋苑工人，係完全可以控制得到，管業處應該要馬上處理。另外對於外賣單車，管業處會致函相關外賣平臺，要求佢地指示外賣員遵守屋苑管理要求。

我地明白呢個唔容易，唔係一朝一夕處理得好，問題之所以越來越嚴重，除咗貼海報掛banner之類被動措施以外，關鍵在於保安人員有無主動性，而家嘅保安員係唔會對單車者作出任何阻撓，連簡單一句勸喻都唔做，咁樣一般居民就更加唔會出聲了。管業處同意要求保安員遇到單車問題，必定要出聲勸喻或阻止，如果保安員肯主動去做，相信我地居民見到的都會聲援，問題就算唔會根治，起碼也會減少。

雙方探討過意外賠償問題，管業處表示雖然屋苑有買保險，不過遇到意外係咪一定得到賠償，好視乎個別追責情況而定，無辦法俾到絕對答案。

5. 噪音問題

主要有兩類投訴 (1)裝修噪音 (2) 鄰居噪音。管業處反映裝修噪音相對比較容易追蹤及處理，一般裝修工人大致都遵守噪音工作時限，不過居民自己動手做一啲好似鑽牆嘅噪音，就比較難追尋和處理，有時候需要入屋檢查也未必得到住戶配合。

另外我地都反映有受到鄰居長期噪音滋擾嘅個案，由於個別情況不一樣，點樣處理各有不同，不過管業處及區議員都同意可以充當調解角色，建議相關受噪音困擾住戶，可以聯系我地 (或直接區議員) 反映。

6. 夜間投訴

關於噪音問題，大多數發生在夜間，但係收到好多居民投訴管業處夜間當值人員處理各樣投訴都不積極，有時候熱線無人接聽，或者接聽者對居民態度非常之怠慢。管業處同意會內部跟進，對員工加強培訓，任何時候都應該要積極處理客戶意見。

7. 吸煙問題

我地反映屋苑公眾地方普遍存在吸煙、扔煙頭問題，既影響環境衛生，亦影響他人健康。管業處回應屋苑公眾地方，現時有口罩令(吸煙不受轄免)還算可以規管、勸喻，如果回復係正常時期，係無現行法例唔俾係屋苑公眾地方吸煙或指定吸煙區，到時候其實係束手無策嘅，呢個係比較令我地失望，相信日後需要再研究有無對策。

8. 養狗問題

居民反映有住戶養狗，一般無影響其他住戶的話，都可以容忍看待，但係有住戶係屋苑範圍入面放狗，甚至於任由狗隻便溺又唔處理，對於呢啲個案，要求管業處一定要嚴肅處理。

以上記要有什麼補充、錯漏之處，煩請今天與會者幫忙指正。大家如果還有任何意見希望我們轉達管業處，歡迎留言或電郵sunshinetinshing@gmail.com。

今日會議各方都感覺良好，而且同意以後都應該定期會面交流。下次與會面定於7月第一週，日子一旦確定，我地會通知大家，歡迎大家參與。